Dlshad Zamua

لەم نیشتیمانەدا هەزاران هونەرمەندی تەلارساز و نەخشساز هەبوون، سروشت و تەلارسازی لە هونەریاندا ڕەنگیداوەتەوە.

دیواری خان و قەیسەری و مزگەوت و ماڵە کەلەپورییەکانی شار و شارۆچکەکانی کوردستان بە سەدان ڕەگەزی هونەری گرنگیان تێدایە کە دەکرا هونەرمەندان، وێنەکێشان و تەلارساز و ئەندازیارانی کورد ئەم ڕەگەزە هونەرییانەیان لە هونەر و تەلارسازی نوێدا بەکاربهێنایە، بەڵام بەداخەوە، زۆربەی تەلارساز، ئەندازیار و هونەرمەندانی وێنەکێش و پەیکەرساز ڕەگەزی هونەری و تەلارسازی وڵاتانی بێگانە دێننە ئەم نیشتیمانەوە، بوونەتە بەشێک لە داگیرکاری کەلتوری و هونەری و تەلارسازی. ئەمە جگە لە بازرگانە چاوچنۆکەکان کە هەردەم کاڵای ساختەی تەلارسازی و هونەری بێگانە دێنن.

ئەم نەخشە جوانە تێکەڵەی ڕەگەزی تەلارسازی کەوان، لەگەڵ گوڵێک لە شێوەی گوڵە سەوسەن یان گوڵە شلێر لەسەر دیواری بەردینی خانی مەحمود ئاغای غەفورییە لە شاری کۆیە. هونەرمەندی نەخشسازی کورد سەدەیەک لەمەوبەریان کۆنتریش لەسەر بەرد نەخشاندوویەتی. ئەم نەخشە بۆخۆی دەکرا ببوایە لۆگۆی زانکۆی کۆیە یان شارەوانی ئەو شارە دێرینە. لە شار و شارۆچەکانی ئەم نیشتیمانە دەیان نەخشی لەم جۆرە هەن، بەداخەوە لە هونەر و تەلارسازی نوێدا ڕەنگیان نەداوەتەوە. بە ئومێدی ئەوەی کاری زیاتر لەسەر ئەم نەخشانە بکرێن.

تێبینی: بیست ساڵێک لەمەوبەر، ڕۆژێک لەگەڵ نیگارکێشی بەتوانا کاک ڕۆستەم ئاغالە باسی ئەم نەخش و گوڵانەمان کرد. وەک لەبیرم بێ، پاش ماوەیەک وتی جۆرێک لە گوڵی سروشتیم لە دەوروبەری کۆیە بینیوە کە لەو گوڵانەی نەخشی سەر تەلارەکانی کۆیە دەچن.